Carleto, Atento ai schiti

Da in alto al piedistalo ti vardi drito

ma, forse, sarìa megio vardar ‘basso.

Ti vedaressi tanti venessiani

co’ in man ‘na valiseta. I va a Mestre.

Parché xe proprio lori, i poareti,

che, nati qua, no li ga gnanca el dirito

de viver e morir a casa sua,

fra i quatro muri che li ga visti nàsser.

Ti ghe ne sa qualcossa, ti, Carleto,

morto a Parigi, poareto in cana.

Ti sa che qua i colombi del Palasso

co i schita, i schita forte, come vache.

Ocio al tricorno, e stròpite le recie.

Le ciacole le xe tante,…pochi i fati.

E stròpite anca el naso, par queli rii

che speta da ‘na vita che i li scava.

La boca, no! Quela no stròparla mai!

Continua a dirghe robe a quel Palasso

dove che i fa el zogo de le tre carte

e i venessiani resta busarài.

Se ti, Carleto, ti speri ancora

e no ti xe coverto da le schitàe

xe grassie ai “Duri i banchi” che t’à fato,

sarà un dies’ani fa, un “maquillage”.

Se ti spetavi queli che dal Palasso

governa ìsta cità, ti stavi fresco

anzi, ti stavi in m….., de sicuro.

Opur i te comprava i milanesi.

I siori, queli da fora, compra case,

una a Cortina, una qua a Venessia

e viver qua o là xe la stessa roba.

Basta ìver drio el libreto de li assegni.

Venessia resta senza venessiani

e no la sarà più quela, sèmo sicuri,

parchè el parlar forbìo de le to comedie

no sentiremo più fra cali e campieli.

Fane sentir ancora la to voze.

Svègia ‘sta zente che xe indormensada,

però no sta fidarte del Palasso.

Atento, ti Carleto, atento ai schiti.

Gianni Spagnol 1992