Dorsoduro VeneziaFRADÈI, SÉMO NATI CUSSÌ…

Nel lontan 1903, la beléssa de 75 ani fà

a un luganeghér in Venessia,

nel so laboratorio-masaghén,

poco nèto forse soravìa,

ma ben fornìo tanto

da esser alquanto incasinà,

xé sucèsso che insacàndo salumi

in te le buèle

fors’anco ben lavàe

ma sens’altro sparpagnàe

fra banchi, tòle, gansi picèi,

ménsole, cantoni, frigoriferi no!

ma in cassèla dei bèssi si,

ghe xé sbrissà in te ‘na buèla

dirìa senza voler … ànsi

sens’altro controvògia

oltre al paston profumà,

saorìo, ben trità, grasso-magro

come comandava alora cossiensa,

passion de mestièr, onestà,

ignoransa o mancansa de fisime

de grassi, lipidi, colesteroi, protidi;

come comandava insoma el bon dio!

ghe xè sbrissà un patacon d’arzento

da dièse … da vinti a farla granda

lire!

Oh! meravègia! diré vù.

Eh! si. Xé sucésso!

E avendo un cliente protestà

par ‘sta sporca indecensa

(miga gièra un sorséto in t’el late,

né un ramaro in te l’acqua gassada,

né ‘l difenilpinpinpirasolina in te i fruti)

el nostro luganeghèr ga pensà:

o sò sémpio o gò màssa bèssi.

E ‘ndà a la sera in quel de san Lio,

ne l’ostarìa al Mondo Novo dove,

fra qualche partia a briscola

e a più de qualche ombréta tuto d’un fià,

co i so colèghi e non,

s’à confidà…

Ma anca a mi me xé sucèsso

dise Toni, Caio, Sempronio… no! gièra malà.

E avéndo butà l’òcio fora de la porta

fin dentro da Leandro fritolin

a vèder quei poaréti proletari

che zorno dopo zorno dentro de le buèle

insacàva solo e sempre

polenta e anguèle,

i gà vùo çertéssa, convinsion

che al mondo ghe xé ànca

chi stà pèso!

Çinque, çinquanta man s’à unio

in gròpo duro e convinto

e da quele man xé sbrissài

continui, silenziosi pataconi

da dièse … da vinti a farla granda

lire!

A far del ben!

E fra un sorido de bontà

e ‘na lagrema d’orgoglio xé s-ciopà

un sigo

a la vècia Gloriosa Mare robà:

DURI I BANCHI

E dura ancora…

Silvano Bernardi

In Venessia, 12 dicembre 1978